Sokoto
Nigeriako ipar-mendebaleko estatua. 102.535 km2 (Nigeriako bigarren estatua da eremuari dagokionez) eta 4.392.391 biztanle (1991). Lurralde idorra da (basamortu-lurraldea Nigerreko mugan), eta sabanako landareak eta zuhaixka arantzadunak dira landare ugarienak. Nekazaritza da ekonomia-jarduera nagusia.
Historia
Fulanien eta hausen jihad edo erlijio-gerren ondoren, fulanien esku geratu zen Sokotoko lurraldea (1808), eta fulanien inperio handia eratu zen. 1903an britainiar gudarosteek fulaniak menderatu zituzten, eta inperioa Nigeria iparraldeko babespeko herrialdearen parte bihurtu zen. Nigeriak independentzia eskuratu zuenean, Nigeriako Iparraldeko eskualdea osatu zuen, eta Ipar-mendebalekoa 1967tik aurrera. Gaur egun, Sokotoko estatuak fulanien inperioko emirerri handienak izan ziren Sokoto eta Gwandu emirerriak eta Kontagore emirerria izan zen lurraldearen iparraldea hartzen ditu.
Erreferentziak
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.
