Juan Arana Ezpeleta

Juan Arana Ezpeleta
Bizitza
Jaiotzako izen-deiturak	Juan Arana Ezpeleta
Jaiotza	Bedoña, 1907ko urtarrilaren 27a
Herrialdea	Gipuzkoa
Heriotza	Donostia, 1933ko martxoaren 23a (26 urte)
Hezkuntza
Hizkuntzak	euskara gaztelania
Jarduerak
Jarduerak	monjea, poeta eta idazlea
Mugimendua	Euskal Pizkundea
Izengoitia(k)	Loramendi
Sinesmenak eta ideologia
Erlijio-ordena	Anaia Txiki Kaputxinoen Ordena

Juan Arana Ezpeleta —Loramendi, idazle goitizenez; frai Joakin Bedoña, erlijio izenez— (Bedoña, Gipuzkoa, 1907ko urtarrilaren 27a - Donostia, Gipuzkoa, 1933ko martxoaren 23a) elizgizona eta euskal olerkaria izan zen.

Bizitza

Juan Arana Bedoña auzoan jaio zen, garai hartan Aretxabaletako auzoa zen oraindik, 1966an Arrasate izatera pasa zen. Hamahiru urte zituela Altsasuko kaputxinoetan sartu eta bost urte geroago, 1925ean, abitua hartu zuen. Teologia ikasten ari zela, gaixotu, eta 26 urte ozta-ozta beterik zituela hil zen peritonitis eraso batek jota.

Zeruko Argia eta Yakintza aldizkarietan argitaratu zituen bere idatziak. Espainiako Gerra Zibilaren aurreko Olerkarien belaunaldikoa izan zen, Lizardirekin, Lauaxetarekin eta Orixerekin batera. Loramendiren olerkigintza lirikoa da, eta, sarri, Jainkoa du kantagai.

Tolosan (1931) eta Hernanin (1932) Euskaltzaleak erakundeak, Aitzolen agindura, eratutako Olerki Jaietan bi sari jaso zituen Arrantzalien arrats-otoitza eta Barruntza leyotik izeneko olerkiekin. Julen Yurrek, 1960an, Aranaren idazlan guztiak bildu eta argitaratu zituen Loramendi. Olerki ta idatzi guziak izenburupean.

Lanak

• Olerki eta idatzi guztiak (1960, Itxaropena), Juan Aranaren idazlan guztien bilduma, Julen Yurrek prestatua.

Erreferentziak

Ikus, gainera

• Euskal Pizkundea
• Gipuzkoako idazleen zerrenda
• Debagoiendar ospetsuen zerrenda

Kanpo estekak

• Juan Arana literaturaren zubitegian
• Auñamendi: Juan Arana

• Datuak: Q12260945